SANGU-ში სხვადასხვა სფეროში წარმატებული, ნიჭიერი ახალგაზრდები სწავლობენ.
დღეს გაგაცნობთ ბოლნისის სიონის ფეხბურთელს, თორნიკე ჯანგიძეს, რომელიც ბიზნესის ადმინისტრირების მიმართულების II კურსის სტუდენტია.
11 წელია აქტიური საფეხბურთო ცხოვრებით არის დაკავებული, მისი სურვილია ორივე სფეროში წარმატებას მიაღწიოს. მიიჩნევს, რომ წარმატებისთვის - „მთავარია არ დანებდე არასდროს და განაგრძო შრომა დასახული მიზის მისაღწევად“.
მოგესალმები თორნიკე.
მოგესალმებით.
უკვე მეორე წელია SANGU-ში ბიზნესის ადმინისტრირების სპეციალობას ეუფლები, რამ განაპირობა პროფესიის არჩევა?
სკოლის და აბიტურიენტობის წლებში ხშირად მეცვლებოდა პროფესიებისადმი შეხედულებები. საბოლოოდ ბიზნესის ადმინისტრირებაზე შევაჩერე არჩევანი, რადგან ვფიქრობ, რომ დღეს ერთ-ერთი პერსპექტიული სფეროა, რომელსაც ბევრი საინტერესო განხრა აქვს.
სანგუში სწავლის გადაწყვეტილება...
უპირველეს ყოვლისა, თუ რატომ ავირჩიე სანგუ, არის ის, რომ უნივერსიტეტი დაკომპლექტებულია პროფესიონალებით და აკმაყოფილებს ყველა საჭირო სტანდარტს. SANGU-ში არის ძალიან თბილი გარემო, რაც სასწავლო პროცესს ბევრად სასიამოვნოს ხდის.
რა ასაკიდან ხარ სპორტით დაკავებული, მიღწეულ წარმატებათა შორის რომელს გამოარჩევ?
8 წლის ასაკში, ჩემი დაჟინებული თხოვნის შემდეგ, მშობლებმა შემიყვანეს ფეხბურთზე და მას შემდეგ სპორტის ამ სახეობით ვარ დაკავებული. ამ ხნის მანძლზე ბევრი გამორჩეული მომენტი დამიგროვდა, თუმცა მაინც ყველაზე დიდი წარმატება იყო საქართველოს ნაკრების 19 წლამდელთა მაისურით უნგრეთში მოპოვებული ელიტ რაუნდის საგზური. ამჟამად ვთამაშობ ბოლნისის სიონში, იჯარის წესით.
სწავლა და აქტიური საფეხბურთო ცხოვრება, როგორ უთავსებ ერთმანეთს?
11 წელია აქტიურად ვთამაშობ ფეხბურთს და ფაქტიურად მთელი ცხოვრება მიწევს სწავლის და სპორტის შეთავსება, რაც ძალიან რთულია, თუმცა არა შეუძლებელი. ჩვეულებრივზე მეტი მონდომება და შრომაა საჭირო რათა ფიზიკურად დამღლელი დღის შემდეგ დრო სწავლასაც დაუთმო.
ფეხბურთი ისეთი სპორტია, ძირითადად ღია ცის ქვეშ ხდება თამაში, მაგრამ კოვიდმა, ალბათ, რაღაც დოზით მაინც შეცვალა აქტიური სპორტული ცხოვრება...
დიახ, კოვიდმა ნამდვილად შეცვალა ჩვენი აქტიური სპორტული ცხოვრება. საქართველოს მთავრობის მიერ გაწეული რეკომენდაციების გათვალისწინებით რამდენიმე თვით მოგვიწია გაჩერება, რაც სპორტსმენისთვის ძალიან დიდი დროა. ამჟამად ჩვეულ რეჟიმში მიმდინარეობს ჩემპიონატი, თუმცა მაყურებლის გარეშე.
რა არის მნიშვნელოვანი წარმატებისთვის?
იმისათის რომ წარმატებული იყო სფეროში რომელიც აირჩიე, საჭიროა ძალიან ბევრი შრომა. მთავარია არ დანებდე არასდროს და განაგრძო შრომა დასახული მიზის მისაღწევად.
რა გეგმები გაქვს სწავლის დასრულების შემდეგ?
სწავლის დასრულების შემდგომი გეგმები დამოკიდებულია როგორც სწავლაზე, ასევე სპორტზეც, ამიტომ წინასწარ ვერაფერს ვიტყვი. იმედი მაქვს, შევძლებ ორივე სფეროში სათანადოდ დავიმკვიდრო ადგილი და ბოლომდე მივყვე არჩეულ გზას.
დიდი მადლობა, წარმატებებს გისურვებ.
გმადლობთ.
მოამზადა ნინო აბრამიშვილმა
გააზიარე
