28 ნოემბერს, SANGU-ს წმ. მეფე დავით აღმაშენებლის სახელობის საკონფერენციო დარბაზში საზოგადოებრივი მაუწყებლის მიერ გადაღებული დოკუმენტური ფილმის „გამაგრდით, არხოტიონნო“ ჩვენება გაიმართა.
ეთერ თათარაიძისა და ამირან არაბულის ავტორობით გადაღებული ფილმი გვიამბობს არხოტის ხეობაზე, იქ არსებული სოფლების ისტორიაზე, არხოტელების წეს-ჩვეულებაზე, კულტურასა და ზეპირსიტყვიერებაზე.
ფილმი, რომელშიც მაყურებელი წარსულის რჩეულ არტეფაქტებს დიდი რაოდენობით იხილავს, ბესიკ გაფრინდაშვილის რეჟისორობითაა გადაღებული, პროექტის ხელმძღვანელია ლია ტოკლიკიშვილი.
ფილმის ჩვენებას კინოკრიტიკოსები, მწერლები, მოწვეული სტუმრები და სხვადასხვა უნივერსიტეტის სტუდენტები ესწრებოდნენ.
