15 ივნისს წმ. ანდრიას ქართულ უნივერსიტეტში, საქართველოს საპატრიარქოსა და საქართველოს მეცნიერებათა აკადემიის ორგანიზებით, საგანმანათლებლო პროგრამა „ქართული თვითმყოფადობის“ ფარგლებში გაიმართა საჯარო ლექცია თემაზე „ქართული კინო XXI საუკუნეში“, რომელსაც უძღვებოდა ხელოვნებათმცოდნეობის დოქტორი, სრული პროფესორი ლელა ოჩიაური.
მომხსენებელმა ისაუბრა XXI საუკუნის ქართული კინოს განვითარების ძირითად ტენდენციებზე, თანამედროვე კინოპროცესებზე, ქართული კინემატოგრაფიის წინაშე არსებულ გამოწვევებსა და საერთაშორისო სივრცეში მის ადგილსა და მნიშვნელობაზე.
ლექციის ფარგლებში განხილული იყო თანამედროვე ქართული კინოს თემატური და მხატვრული თავისებურებები, ახალგაზრდა რეჟისორების შემოქმედებითი ძიებები, ასევე ქართული კინოს როლი ეროვნული კულტურისა და თვითმყოფადობის წარმოჩენის პროცესში.
შეხვედრა ინტერაქტიულ ფორმატში წარიმართა. მონაწილეებს შესაძლებლობა ჰქონდათ დაესვათ შეკითხვები და ჩართულიყვნენ დისკუსიაში ქართული კინოს თანამედროვე განვითარების საკითხებზე.
საგანმანათლებლო პროგრამა „ქართული თვითმყოფადობა“ მიზნად ისახავს ეროვნული კულტურის, ისტორიისა და სულიერი მემკვიდრეობის შესახებ ცოდნის გაღრმავებას და საზოგადოების სხვადასხვა ჯგუფის აქტიურ ჩართულობას აღნიშნული საკითხების განხილვაში.
