სოფიო ჯანჯღავა

„ცოდნა, სწავლა-განათლება დღევანდელი კაცისათვის არსებითი პურია“, - ბრძანებს  ილია ჭავჭავაძე.

სკოლაში სწავლის პერიოდში ყველა მოსწავლის სურვილია კარგი განათლების მიღება და წარმატების მიღწევა, რაც უშუალოდ შესაბამისი უმაღლესი სასწავლებლის შერჩევას გულისხმობს. მეც, ამ სურვილით აღვსილმა, დიდი პატივისცემითა და სიხარულით არჩევანი შევაჩერე ქართულ უნივერსიტეტზე. უნივერსიტეტის შესახებ ჩემი უახლოესი მეგობრის, ამავე უნივერსიტეტის სტუდენტის ნინო მარგველანისაგან შევიტყვე. იგი იმდენად იყო შეყვარებული უნივერსიტეტზე და ისეთი სითბოთი საუბრობდა იქ არსებულ გარემოზე, რომ ჩემი დიდი დაინტერესება გამოიწვია. სანამ უნივერსიტეტში მოვიდოდი უკვე ბევრი კარგი რამ ვიცოდი მასზე. თუმცა სუბიექტური ვიქნები და ვიტყვი, რომ ჩემს არჩევანზე, გარდა უნივერსიტეტში არსებული სწავლების მაღალი დონის კოეფიციენტისა და სხვა ფაქტორებისა, დიდი გავლენა იქონია იმან, რომ უნივერსიტეტი სრულიად საქართველოს კათოლიკოს-პატრიარქის, უწმიდესისა და უნეტარესის, ილია II ლოცვა-კურთხევითა და ძალისხმევით არის დაარსებული. ჩემთვის დიდი პატივია სწავლა-განათლების მიღება უწმიდესის მიერ დალოცვილ კედლებში.   

უნივერსიტეტში მოვედი დიდი ენთუზიაზმით, მისწრაფებებითა და მოლოდინებით, დღეს კი ბევრად აღმატებული განცდებითა და მიზნებით ვაგრძელებ წინსვლას. კარგად მახსოვს უნივერსიტეტის პირველი დღე. ვიფიქრე, თავს უცხოდ ვიგრძნობდი და დიდი დროც დასჭირდებოდა ახალ გარემოსთან შეგუებას, თუმცა ყოველგვარი გადაჭარბების გარეშე ვიტყვი, რომ მეორე დღესვე მე სახლში ვგრძნობდი თავს. ამის მიზეზი, პირველ რიგში, ის ადამიანები არიან, ვინც დაუღალავი შრომითა და დადებითი ემოციებით ცდილობენ ღირსეულად აღასრულონ თავიანთი საქმე და ცოდნასთან ერთად დიდ სიყვარულს გიზიარებენ. არ შემიძლია არ ვახსენო, პირველი ლექტორი, ბატონი თეიმურაზ გვანცელაძე, ადამიანი რომელმაც ერთი ლექციით შეძლო გაეფანტა ყველა ის ემოცია, რაც პირველ დღესთან, უცნობ გარემოსთან და ცხოვრების ახალი ეტაპის დაწყებასთან არის დაკავშირებული. ამგვარი განცდა იყო ყველა ლექტორთან შეხვედრა. 

უკვე ორი წელი სრულდება, რაც ქართული უნივერსიტეტის სტუდენტი ვარ და დიდ პასუხისმგებლობასთან ერთად დიდ სიხარულს განვიცდი. აქ გატარებული ყოველი დღე არის სიახლე, მრავლისმომცველი, მრავლისმომცემი, საინტერესო, შემეცნებითი და რაც მთავარია, მომავლისკენ გადადგმული კიდევ ერთი დიდი ნაბიჯი.     

აქ ყველა შენი მეგობარია, ყველა გეხმარება და გასწავლის, ერთის წარმატება ყველას წარმატებას ნიშნავს. აქ სწავლობ ურთიერთპატივისცემას, მეგობრობას, თანადგომას. უნივერსიტეტში არსებული გარემო გაძლევს დიდ სტიმულს გადალახო ყველა შემხვედრი დაბრკოლება და გაუჩერებლად იარო წინ დასახული მიზნისკენ, რაც არის კარგი განათლების საწინდარი; კარგი განათლება კი არის მთავარი ძალისა და ღონის მიმცემი, როგორც პიროვნებისთვის, ისე ქვეყნისთვის.

ქართული უნივერსიტეტი უკვე 10 წელია ღირსეულად ასრულებს თავის მისიას, ამართლებს დევიზსს, "შეიცან თავი შენი" და "არსებითი პურის" მიღებაში ეხმარება ახალგაზრდებს. 

კიდევ ერთხელ გამოვხატავ დიდ მადლიერებასა და პატივისცემას ამ უნივერსიტეტში მოღვაწე თითოეული ადამიანის მიმართ. მინდა ჩემს უნივერსიტეტს წინსვლა და კიდევ ბევრი წარმატება ვუსურვო.