იურიდიული კლინიკა, რომელიც ქართული უნივერსიტეტის ჰუმანიტარულ მეცნიერებათა და სამართლის სკოლის ბაზაზე შეიქმნა, სამართლის მიმართულებით საბაკალავრო და სამაგისტრო საგანმანათლებლო პროგრამის სტუდენტებს მისცემს უნივერსიტეტში მიღებული თეორიული ცოდნის პრაქტიკაში რეალიზების შესაძლებლობას და პრაქტიკულ უნარებს გამოუმუშავებს. კლინიკა ასევე უსასყიდლოდ მოემსახურება სოციალურად დაუცველ მოქალაქეებსა და დევნილებს.
იურიდიული კლინიკის მიზნებზე, ფუნქციებზე და საქმიანობის მიმართულებებზე გვესაუბრება კლინიკის ხელმძღვანელი SANGU-ს ჰუმანიტარულ მეცნიერებათა და სამართლის სკოლის კოორდინატორი, მოწვეული ლექტორი ქეთევან ხურცილავა.
როგორ გაჩნდა იურიდიული კლინიკის შექმნის იდეა და რა მიზანს ემსახურება იგი?
ნებისმიერი იურისტისთვის მნიშვნელოვანია თეორიულ ცოდნასთან ერთად კარგი პრაქტიკული უნარ-ჩვევების გამომუშავება. კლინიკაში რეალური ქეისების დამუშავებით სტუდენტები შეძლებენ თეორიული ცოდნის პრაქტიკაში რეალიზებას, რაც განაპირობებს ბაზარზე კონკურენტუნარიანი იურისტების მომზადებას. კლინიკა ასევე მიზნად ისახავს სოციალურად დაუცველი მოქალაქეებისა და დევნილებისთვის უფასო იურიდიულ დახმარებას, რასაც ზედამხედველობას გაუწევენ კლინიკაში მოწვეული იურისტები.
რა აქტივობებს და ღონისძიებებს განახორციელებს კლინიკა და ვინ იქნებიან მასში ჩართული?
კლინიკა სტუდენტთა და პრაქტიკოს იურისტთა ჩართულობით განახორციელებს ტრენინგებს/ვებინარებს სკოლის მოსწავლეებისათვის, იმიტირებულ სასამართლო პროცესებს, რომლის ფარგლებშიც მოეწყობა დისკუსია-დებატები, სამართლებრივ დახმარებას გაუწევს მოქალაქეებს, რაც გულისხმობს: უფასო კონსულტაციებს, სამართლებრივი დოკუმენტების (სარჩელი, შესაგებელი, საჩივარი და სხვა) მომზადებას.
ვინ წარმართავს კლინიკის საქმიანობას?
კლინიკის საქმიანობას წარმართავს იურიდიული კლინიკის ხელმძღვანელი, რომელიც უზრუნველყოფს კლინიკის ყოველდღიურ მუშაობას, კლინიკაში პრაქტიკული კომპონენტის და სტაჟირების განხორციელების პროცედურებს, მოიწვევს დარგის შესაბამის სპეციალისტებს, ზედამხედველობას გაუწევს პრაქტიკული კომპონენტის განხორციელებას.
გააზიარე
