USAID განათლება მომავლისთვის

19 მარტს, SANGU-ში, USAID-ის პროგრამის „განათლება მომავლისთვის“ ფარგლებში მორიგი სამუშაო შეხვედრა გაიმართა.

ამჯერად „განათლება მომავლისთვის“ პროგრამის სამუშაო ჯგუფმა SANGU-ს აკადემიურ და ადმინისტრაციულ პერსონალთან ერთად განათლების ლიდერთა სატრენინგო პროგრამების მომზადების შესახებ იმსჯელეს. წმ. ანდრიას ქართული უნივერსიტეტის წარმომადგენლებმა მათ თავიანთი ხედვა გაუზიარეს და პროგრამის მუშაობაში ჩართულობის შესაძლებლობებზე ისაუბრეს.

პროგრამის საუნივერსიტეტო განათლების უფროსმა მრჩეველმა ეკატერინე სლოვინსკიმ განმარტა, რომ პროექტის ფარგლებში შექმნილი პროგრამები შესაძლოა ტრანსფორმირდეს განათლების ადმინისტრირების სამაგისტრო პროგრამებში, რომლებიც განკუთვნილი იქნება მოქმედი და მომავალი განათლების ადმინისტრატორებისთვის და წამყვან პოზიციაზე მომუშავე პერსონალისთვის. პროგრამის ფარგლებში შექმნილი სხვადასხვა საგანმანათლებლო მოდულების დახმარებით მოქმედი განათლების ადმინისტრატორები კვალიფიკაციის ამაღლებას სასურველი მიმართულებით შეძლებენ.

USAID-ის პროგრამის „განათლება მომავლისთვის“ ფარგლებში, აშშ-ის არიზონის სახელმწიფო უნივერსიტეტსა და პარტნიორ ქართულ უნივერსიტეტებს შორის თანამშრომლობის მემორანდუმი ცოტახნის წინ გაფორმდა, რომლის მიზანი უნივერსიტეტებში მასწავლებლის მოსამზადებელი საგანმანათლებლო და განათლების მეცნიერებების პროგრამების განვითარების ხელშეწყობაა.