7 ნოემბერს, წმ. ანდრიას ქართულ უნივერსიტეტში გაიმართა შეხვედრა „ჰორიზონტი ევროპა“ საქართველოს ეროვნული ოფისის წარმომადგენლებთან. ღონისძიება მიზნად ისახავდა მონაწილეების ინფორმირებას „ჰორიზონტი ევროპა“ პროგრამის დაფინანსების ინსტრუმენტებისა და პროცესების შესახებ.
შეხვედრა მისასალმებელი სიტყვით გახსნა SANGU-ს პრორექტორმა საერთაშორისო მიმართულებით, არჩილ ყანჩაველმა, რომელმაც ხაზი გაუსვა უნივერსიტეტის მისწრაფებას, საერთაშორისო პროექტებში ჩართულობით ხელი შეუწყოს კვლევითი და საგანმანათლებლო მიმართულებების განვითარებას საქართველოში.
„ჰორიზონტი ევროპა“ საქართველოს ეროვნული ოფისის ხელმძღვანელმა, ლევან ხეცურიანმა, დამსწრეებს გააცნო პროგრამის ზოგადი ხასიათი და მიმოიხილა არსებული საგრანტო შესაძლებლობები. პროგრამა „ჰორიზონტი ევროპა“ საქართველოს უნივერსიტეტებსა და მეცნიერებს სთავაზობს მნიშვნელოვან შესაძლებლობებს კვლევითი თანამშრომლობისა და ინოვაციური პროექტების განვითარებისთვის.
შეხვედრაზე წარმოდგენილი იყო „ჰორიზონტი ევროპა“ პროგრამის სოციალური და ჰუმანიტარული მეცნიერებების (SSH) მიმართულება, რომელიც აუდიტორიას გააცნო „ჰორიზონტი ევროპა“ საქართველოს ოფისის წარმომადგენლმა თამარ ბერბერაშვილმა.
შეხვედრა ინტერაქტიულ ფორმატში წარიმართა, რაც მონაწილეებს საშუალებას აძლევდა დასმული კითხვების საფუძველზე დამატებითი ინფორმაცია მიეღოთ.
SANGU მადლობას უხდის „ჰორიზონტი ევროპა“ საქართველოს ეროვნულ ოფისს. მსგავსი ღონისძიებები ხელს შეუწყობს სტუდენტების და მეცნიერების ევროკავშირის პროექტებში ჩართულობის გაზრდას და საერთაშორისო კავშირების გაღრმავებას.
გააზიარე
