SANGU-მ პროექტის - „უკეთესი განათლება უკეთესი მომავლისთვის“ წარმომადგენლებს უმასპინძლა

10 ივლისს, წმ. ანდრიას ქართულმა უნივერსიტეტმა, პროექტის - „უკეთესი განათლება უკეთესი მომავლისთვის“ ფარგლებში პროექტის ხელმძღვანელს, ციურიხის მასწავლებელთა განათლების უნივერსიტეტის დოქტორს, კორინა ბორერს და ადგილობრივი პარტნიორი ორგანიზაციის წარმომადგენლებს - მასწავლებელთა პროფესიული განვითარების ეროვნული ცენტრის დირექტორს, ბერიკა შუკაკიძეს და პროექტის წევრებს, ამავე ცენტრის თანამშრომლებს ნათია ნაცვლიშვილს და მაია არავიაშვილს უმასპინძლა.

სტუმრები SANGU-ს რექტორმა, პროფესორმა ირაკლი ბრაჭულმა მიიღო და პროექტის მიმდინარეობას გაეცნო, რომელიც ხორციელდება ციურიხის მასწავლებელთა განათლების უნივერსიტეტის ხელმძღვანელობით და ხარისხიანი განათლების ხელშეწყობას ემსახურება სომხეთში, საქართველოსა და მოლდოვაში.

შეხვედრის ფარგლებში დოქტორი კორინა ბორერი, SANGU-ს მასწავლებლის მომზადების 60 კრედიტიანი პროგრამის პროფესორ-მასწავლებლებს, პროექტის მიზნებისა და სპეციფიკის შესახებ დეტალურად ესაუბრა. პროექტის სხვადასხვა ასპექტებზე ისაუბრეს ნათია ნაცვლიშვილმა და მაია არავიაშვილმა. შეხვედრაზე წარმოადგინეს პროექტის მონაწილის როლფ გოლობის ავტორობით გამოცემული პუბლიკაციების ქართული თარგმანები. თავად ავტორმა მათ შესახებ ონლაინ რეჟიმში დეტალურად ისაუბრა. სტუმრებმა ყველა მონაწილეს საჩუქრად გადასცეს ეს პუბლიკაციები. აღნიშნული პუბლიკაციები უნივერსიტეტს სკოლებთან აქტიური თანამშრომლობით, დაეხმარება, მოამზადოს ხარისხიან განათლებაზე ორიენტირებული მასწავლებელი.

პროექტი 2021 წელს დაიწყო და მიზნად ისახავს მის ფარგლებში დაგეგმილი პროფესიული განვითარების მხარდამჭერი რესურსების მომზადებას, პროფესიული განვითარების აქტივობების ორგანიზებას და სწავლა-სწავლების პროცესის გაძლიერებას სკოლებსა და უნივერსიტეტებში - მასწავლებლის მომზადების პროგრამებში. პროექტი 2024 წელს დასრულდება.