სანგუს ბიბლიოთეკა IATUL-ის წევრი გახდა

სანგუს ბიბლიოთეკა IATUL-ის წევრი გახდა

წმ. ანდრიას ქართული უნივერსიტეტის ბიბლიოთეკა შეუერთდა საუნივერსიტეტო ბიბლიოთეკების საერთაშორისო ასოციაციას (IATUL), რომელიც აერთიანებს მსოფლიოს წამყვანი უნივერსიტეტების ბიბლიოთეკებს და უზრუნველყოფს გამოცდილების გაზიარებას, თანამშრომლობასა და ინოვაციების ხელშეწყობას.

IATUL 1955 წელს დაარსდა გერმანიის ქალაქ დიუსელდორფში და ამჟამად 240-ზე მეტი წევრი ბიბლიოთეკა ჰყავს მსოფლიოს სხვადასხვა ქვეყნიდან. ორგანიზაციის მიზანია უნივერსიტეტებს შორის თანამშრომლობის გაღრმავება, ბიბლიოთეკების პერსონალის პროფესიული განვითარება და გლობალურ საგანმანათლებლო და სამეცნიერო პროცესებში აქტიური ჩართულობის უზრუნველყოფა.

სანგუს ბიბლიოთეკისთვის IATUL-ის წევრობა ახალი შესაძლებლობაა — საერთაშორისო კონფერენციებში, ვორქშოპებში და კვლევით პროექტებში აქტიური მონაწილეობა, თანამშრომლობის ახალი პლატფორმების განვითარება და უნივერსიტეტის საერთაშორისო ინტეგრაციის გაძლიერება.