პრეზიდენტის ადმინისტრაციის მიერ, საუკეთესო ქართული სტუდენტური თარგმანისათვის, ელისაბედ ორბელიანის სახელობის ჯილდოს მოსაპოვებლად გამოცხადებულ კონკურსში საქართველოს სხვადასხვა უნივერსიტეტის სტუდენტებთან ერთად საქართველოს საპატრიარქოს წმ. ანდრია პირველწოდებულის სახელობის ქართული უნივერსიტეტის მთარგმნელ-თარჯიმანთა უმაღლესი სკოლის კურსდამთავრებული მარიამ კვერნაძეც მონაწილეობდა. იგი ფინალისტთა შორისაა.
8 ივლისს ორბელიანების სასახლეში კონკურსში გამარჯვებულთა დაჯილდოება გაიმართა. ელისაბედ ორბელიანის სახელობის ჯილდო ორ ნომინაციაში დაწესდა: პროზაული ნაწარმოების ქართული თარგმანისათვის და სამეცნიერო ნაშრომის ქართული თარგმანისათვის. კონკურსში გამარჯვებულ პირველ ოთხეულს ელისაბედ ორბელიანის ჯილდო, მეორე ოთხეულს კი სამადლობელი სიგელები გადაეცათ.
საქართველოს პრეზიდენტმა, ქალბატონმა სალომე ზურაბიშვილმა მონაწილეებს კონკურსში გამარჯვება მიულოცა და მთარგმნელობითი საქმიანობის მნიშვნელობაზე ისაუბრა. მან აღნიშნა, რომ ძალიან მნიშვნელოვანია ჩვენი კულტურა გავაცნოთ ევროპას. გაიხსენა ჩვენი დიდი მოღვაწეები, მეფეები და პოლიტიკოსები, რომლებიც ყოველთვის თარგმნიდნენ უცხო ენებზე - ,,საქართველოს სახელმწიფო და კულტურა თარგმნით იწყება. თუ არა ბიბლიის თარგმანები და შემდეგ მთელი ლიტერატურული თარგმანები, ჩვენ ეს საქართველო არ ვიქნებოდით. ჩვენ გვჭირდება თარგმანი იმისთვის, რომ ჩვენი კულტურა გავაცნოთ და ასევე, ქვეყანაში სხვისი კულტურა შემოვიტანოთ, გავეცნოთ და გავიზიაროთ“ - აღნიშნა პრეზიდენტმა.
მან სიხარული გამოთქვა, კონკურსში უნივერსიტეტების აქტიურად ჩართულობის გამო, რომელიც ყოველწლიურ სახეს მიიღებს, და ისიც აღნიშნა, რომ მომავალ წელს დაემატება ნომინაციები ქართულიდან სხვა ენებზე თარგმანებისთვის.
დასასრულს საქართველოს პრეზიდენტმა მადლობა გადაუხადა ღონისძიების მონაწილეებს და წარმატებები უსურვა მათ.
გააზიარე
