უნივერსიტეტის შერჩევისას, როდესაც დეტალურად იკვლევ ინფორმაციას და გაცნობიერებულ გადაწყვეტილებას იღებ, ყველა მოლოდინი აუცილებლად მართლდება და წარმატებაც გარდაუვალია. ასე ფიქრობს SANGU-ს ფილოლოგიის საბაკალავრო პროგრამის სტუდენტი და სრულიად საქართველოს კათოლიკოს-პატრიარქ ილია II-ის სტიპენდიანტი, ნათია მეკოშკიშვილი.
ინტერვიუში ნათია გვიზიარებს, როგორ დაიწყო მისი აკადემიური გზა, რატომ აირჩია SANGU და როგორია სტუდენტური ცხოვრება ამ უნივერსიტეტში. ის ასევე გვესაუბრება სტიპენდიანტის სტატუსის მნიშვნელობაზე და ფილოლოგიისადმი მის სიყვარულზე.
ნათია, მოგესალმები!
მოგესალმებით.
როგორ გაიგე SANGU-ს შესახებ და რატომ აირჩიე სწავლის გასაგრძელებლად?
პირველად SANGU-ს შესახებ ჩემი მეგობრისგან გავიგე, რომელიც აქ ქართულ ფილოლოგიაზე სწავლობდა. ამის შემდეგ გადავწყვიტე ამ უნივერსიტეტზე მეტი ინფორმაცია მიმეღო და სხვადასხვა ჯგუფში დავიწყე ცნობების შეკრება. როდესაც კარგად გავეცანი ამ უნივერსიტეტის მახასიათებლებს, გაწყვეტილებაც მაშინ მივიღე.
რა კრიტერიუმები იყო მნიშვნელოვანი უნივერსიტეტის შერჩევისას?
ინფორმაციის მოძიების დროს ყველაზე მეტად ის მაინტერესებდა, როგორი გარემო და ლექტორები დამხვდებოდნენ უნივერსიტეტში. ჩემთვის მნიშვნელოვანი იყო სტუდენტზე მორგებული გარემო.
რამდენად გაამართლა შენი მოლოდინი უნივერსიტეტმა, ოთხი წლის შემდეგ რას იტყოდი, სწორი გადაწყვეტილება მიიღე?
თამამად შემიძლია ვთქვა, რომ საუკეთესო არჩევანი გავაკეთე და ჩემი მოლოდინი ნამდვილად გამართლდა.
წელს ვამთავრებ ბაკალავრიატს, თუმცა, SANGU-ში აუცილებლად დავბრუნდები მასწავლებლის მომზადების 60 - კრედიტიან პროგრამაზე.
ვინც უნივერსიტეტში ჩაბარებას აპირებს, მათ აუცილებლად ვურჩევ წმ. ანდრიას სახელობის ქართულ უნივერსიტეტს, რადგან აქ დახვდებათ, როგორც სტუდენტებზე მორგებული გარემო, ასევე, საუკეთესო ლექტორებითა და თანამშრომლებით დაკომპლექტებული გუნდი.
უკვე მერამდენე სემესტრია ინარჩუნებ სტიპენდიანტის სტატუსს, რაც დიდი შრომის შემდეგია. წელს პირველად ხარ სრულიად საქართველოს კათოლიკოს-პატრიარქ ილია II-ის სტიპენდიანტი, ალბათ ძალიან ამაყი ხარ?
ნამდვილად ძალიან ამაყი ვარ. აქამდე საფაკულტეტო სტიპენდიას ვიღებდი, ახლა კი პატრიარქის სტიპენდიანტიც გავხდი, რაც ჩემთვის დიდი პასუხისმგებლობა და ბედნიერებაა.
რატომ ფილოლოგია, რა ასაკში მიხვდი, რომ ამ მიმართულებით უნდა განგევითარებინა შენი შესაძლებლობები?
ქართველებისთვის ქართული ენა ყველაზე დიდი საგანძურია, ამიტომ ის ჩემთვის ბავშვობიდან საყვარელი და მნიშვნელოვანი იყო. სკოლაში სწავლის დროს სხვადასხვა ოლიმპიადებშიც ვიღებდი მონაწილეობას და ვცდილობდი კარგი შედეგი დამედო, თუმცა, ფილოლოგობაზე არ ვფიქრობდი. აბიტურიენტობის დროს ორი ძალიან კარგი მასწავლებელი მყავდა, ერთი - ისტორიის, მეორე - უნარების, მათთან სწავლამ მასწავლებლობაზე დამაფიქრა, რადგან დავინახე რამხელა მნიშვნელობა აქვს კარგ მასწავლებელს ადამიანის ცხოვრებაში, სწორედ ამ პერიოდში გადავწყვიტე ქართულ ფილოლოგიაზე ჩაბარება, ამით ქართული ენის სწავლასაც და მასწავლებლობასაც შევძლებდი.
რას ურჩევ მათ, ვისაც სურს იყოს წარმატებული, რეალიზებული ადამიანი?
ასეთ ადამიანებს ვეტყოდი, რომ წარმატება თავისით არ მოდის და საკუთარი მიზნებისთვის ძალიან ბევრი იშრომონ. შეიძლება რაღაც დღეს არ გამოვიდეს, მაგრამ ხვალ აუცილებლად გამოვა.
ესაუბრა ნინო აბრამიშვილი
ფოტო: ნუგზარ შონია
გააზიარე
