საქართველოს საპატრიარქოს წმ. ანდრია პირველწოდებულის სახელობის ქართულმა უნივერსიტეტმა გამოსცა პროფესორ ვახტანგ გურულის 70 წლის იუბილესადმი მიძღვნილი სამეცნიერო კრებული. კრებულის მომზადებას ხელმძღვანელობდა აკადემიკოსი როინ მეტრეველი. კრებული დაიბეჭდა მისივე რედაქტორობით. ბატონი როინის ინიციატივით გადაწყდა კრებულში, გარდა ქართული უნივერსიტეტის პროფესორებისა, დაბეჭდილიყო საქართველოს მეცნიერებათა ეროვნული აკადემიის, თბილისის სახელმწიფო უნივერსიტეტის, სოხუმის სახელმწიფო უნივერსიტეტის, ბათუმის სახელმწიფო უნივერსიტეტის, ქუთაისის სახელმწიფო უნივერსიტეტის, სამცხე-ჯავახეთის სახელმწიფო უნივერსიტეტისა და სხვა უმაღლესი სასწავლებლების მეცნიერთა ნაშრომები. კრებულში 31 ავტორია წარმოდგენილი, რომელთა ნაშრომები საქართველოს ისტორიის, ქართული ლიტერატურათმცოდნეობის, ქართული სამართლის ისტორიის აქტუალურ საკითხებს ეძღვნება.
კრებული იხსნება აკადემიკოს როინ მეტრეველის წერილით: ,,ჭეშმარიტი მეცნიერი, ღირსეული საზოგადო მოღვაწე”, რომელიც ვახტანგ გურულის სამეცნიერო-პედაგოგიური და საზოგადოებრივი მოღვაწეობის შეფასებას ეძღვნება. კრებულში წარმოდგენილია შემდეგი ნაშრომები: როინ მეტრეველის ,,განათლება და კულტურა საქართველოში (1900-1917 წწ.)”, ოთარ ჟორდანიას ,,საქართველოს რესპუბლიკის ოფიცერთა პოლკის წმინდა გიორგის ჯვრის კავალრები;” ავთანდილ ნიკოლეიშვილის ,,ეროვნული პრობლემის სტალინური კონცეფცია და საქართველო”; მახარე (მიქაელ) ბუკიას ,,ეპისკოპოსი კირიონი _ წმინდანების ისტორიის მკვლევარი (წმინდა ნინო)”; ავთანდილ არაბულის ,,გრიგოლ რობაქიძე და ვაჟას სამყარო” და სხვ.
კრებული გამომცემლობა ,,ქართული უნივერსიტეტის” გრიფით გამოვიდა, დაიბეჭდა გამომცემლობა ,,მერიდიანის” სტამბაში.
გვანცა ბურდული
ასოცირებული პროფესორი
გააზიარე
