კორონავირუსის პანდემიამ სამყარო ერთ ადგილზე გააჩერა, ადამიანები შიშით უყურებენ ხვალინდელ დღეს, ღვთის შეწევნით და ჩვენი ექიმების თავდადებული ღვაწლით საქართველო ჯერჯერობით წარმატებით უმკლავდება მას.
ამ რთულ ვითარებაში ყველაზე მნიშვნელოვანია ჩვენი ერის კონსოლიდაცია, ფიქრი იმაზე, როგორ უნდა გამოვიდეთ ამ უმძიმესი ეკონომიკური და სულიერი მდგომარეობიდან. ამ დროს სოციალურ ქსელებსა და საინფორმაციო სივრცეში გააფთრებული ბრძოლა მიმდინარეობს საქართველოს მრავალსაუკუნოვანი მართლმადიდებელი სამოციქულო ეკლესიის და მისი ამჟამინდელი წინამძღოლის - 87 წლის მხცოვანი კათოლიკოს-პატრიარქის - წინააღმდეგ.
საქართველოს ეკლესიის წინააღმდეგ ბრძოლა ქართველი ერის ერთ-ერთი მთავარი ფასეულობის წინააღმდეგ ბრძოლაა; შესაბამისად, საქართველოს ეკლესიის ნეგატიურ კონტექსტში წარმოჩენა სურს მას, ვისაც არ უნდა ქართველი ერის კონსოლიდაცია დღეს, როდესაც საქართველოში ასე გართულებულია როგორც გეოპოლიტიკური, ასევე, პანდემიური სიტუაცია.
ეკლესიის ოპონენტები აღდგომის შემდეგ ელოდნენ ეკლესიის "კლასტერს", მაგრამ როდესაც იმედები გაუცრუვდათ, ცილისწამების ახალი კამპანია წამოიწყეს ჩვენი ეკლესიის სახელის გასატეხად და ღირსების შესალახად. უწმიდესი და უნეტარესი სრულიად საქართველოს კათოლიკოს-პატრიარქის ილია ll ღვაწლი ქართული ეკლესიის და ქართველი ერის წინაშე განსაკუთრებულია და მისი გაფერმკრთალების ნებისმიერი მცდელობა უნაყოფოა,ქართული უნივერსიტეტი მიუღებლად მიიჩნევს საქართველოს მართლმადიდებელი ეკლესიის და მისი საჭეთმპყრობელის წინააღმდეგ წარმოებულ კამპანიას და სრულ მხარდაჭერას უცხადებს მას.
გააზიარე
